Андрей Рублёв аламли тарзда дисквалификация қилинди

Ярим финалларнинг бирида кутилмаган ҳолат кузатилди. Россиялик Андрей Рублёв қозоғистонлик Александр Бубликка қарши кечган учрашувнинг сўнгги учинчи сети 11-геймида дисквалификация қилинди. Бунга Рублёвнинг чизиқ ҳакамни сўккани сабаб бўлган. 

Андрей Александрнинг зарбаси чизиқдан чиқиб кетгани ва аут бўлганини айтиб, ҳакам билан баҳслашган. Чизиқ ҳаками минорадаги бош реферига вазиятни айтиб, арз қилган. Чизиқ ҳаками рус тилини билган, Рублёв эса уни айнан рус тилида сўккан. Натижада россиялик теннисчи ярим финал учрашувидан четлатилган.    

Бу пайтга келиб ҳисоб 6/7(4), 7/6(5), 6/5, Бублик фойдасига бўлган. Тенничсилар 2 соату 31 дақиқа давомида кортда ҳаракат қилишган. Бублик теннисчиларнинг ўзаро учрашувларида ортда қолмоқда - 3:4. Андрей 9, Александр эса 21 та эйс зарбани амалга оширган. Иккала теннисчи ҳам 3 тадан брейкка эга бўлган. Энди қозоғистонлик ракетка устаси Дубай турнири бош соврини учун франциялик Уго Умберга қарши кортга чиқади.