Ангренда уюшмаган ёшлар ўртасида энг кучлилар сараланди

Эндиликда республиканинг ҳар бир ҳудудида соғлом турмуш тарзининг татбиқ этилишига оид тадбирлар кўлами янада кенгайди.

Хусусан, кеча Тошкент вилояти Ангрен шаҳридаги “Empire Fitness” фитнес клубида ноанъанавий тарзда мусобақа ташкил этилди. Унда оғир атлетика тури бўйича аҳоли қатламининг уюшмаган ёшлари, яъни 18 ёшдан 30 ёшгача бўлган йигитлар куч синашдилар.

Ангрен шаҳар ҳокимлиги, Болалар-ўсмирлар спорт мактаби, Жисмоний тарбия ва спорт бўлими ҳамда хусусий тадбиркор Яшин Норалиевлар томонидан ҳамкорликда ташкил этилган баҳсларда фитнес клубининг 55 нафар аъзоси ўзаро беллашдилар. Баҳсларнинг очилиш ва тақдирлаш маросимида бағишланган тадбирда шаҳар ҳокими Шукурулла Маҳмудов, Жисмоний тарбия ва спорт бўлими ҳамда жамоат ва давлат ташкилотлари вакиллари қатнашдилар.

Тадбирда сўз олганлар айни пайтда давлатимиз раҳбарининг ташаббуси билан аҳоли саломатлигини мустаҳкамлаш ва соғлом ҳаёт тарзини янада такомиллаштириш борасидаги ислоҳотлар ва жойлардаги кенг кўламли тадбирлар хусусида фикр билдирдилар.

Мусобақа натижаларига кўра, ўз вазн тоифаларида ўсмирлар ўртасида биринчи ўрин Х.Султонқулов («Дўстлик» МФЙ)га насиб қилди. Ушбу йўналишда А.Ҳошимов (Чотқол« МФЙ) иккинчи ўринни, Д.Тўхтасинов (»Карвон") эса 3-ўринни қўлга киритди.

Катталар ўртасидаги қизғин баҳсларда Ш.Азимов («Тараққиёт» МФЙ) 1-ўринга сазовор бўлди. Беллашувларда фаол қатнашган Р.Худойберганов иккинчи, («Наврўз-1» МФЙ), Б.Аҳмедов («Навбаҳор» МФЙ) учинчи ўринларни банд этишди.

Ғолибларни шаҳар ҳокими Ш.Маҳмудов эсдалик совғалари ва фахрий ёрлиқлар билан тақдирлади.