АҚШ медаллар жамғариш бўйича биринчи бўлди. Ўзбекистон нечанчи ўринда?

Эркаклар ўртасидаги сув полоси мусобақасининг ҳал қилувчи финал баҳсида Сербия ва Греция терма жамоалари Олимпиада олтин медали учун сувга тушишган. Бу учрашувдаги медаль умумжамоа ҳисобидаги ТОП-10 ликка ҳеч қандай таъсир ўтказмайди. 

Демак, АҚШ терма жамоаси медаллар жамғариш бўйича Токио-2020 Олимпиадасини биринчи ўринда якунлади. Америкаликлар асосий таъқибчилари ҳисобланган Хитой терма жамоасидан битта кўп олтин медаль жамғаришди. Океан орти жамоаси беш йил кутилган олимпия ўйинларида 39 та олтин, 41 та кумуш, 33 та бронза, жами 113 та медаль қўлга киритишди.

Хитой терма жамоаси эса 38 та олтин, 32 та кумуш, 18 та бронза, жами 88 та медалга эгалик қилди. Кучли учликка 27 та олтин, 14 та кумуш, 17 та бронза, жами 58 та медаль билан Япония терма жамоаси якун ясади. ТОП-10 таликдан Буюк Британия, Россия, Австралия, Нидерландия, Франция, Германия ва Италия терма жамоалари жой олди. 

Ўзбекистон терма жамоаси айни пайтда 3 та олтин ва 2 та бронза медали билан дунёнинг 205 давлати орасида 31-ўринни банд этган. Агар Сербия сув полоси терма жамоаси айни дақиқаларда давом этаётган финалда ғалаба қозонса, биздан жадвалда ўтиб кетади.