Australian Open. Аёллар ўртасидаги жуфтлик баҳсларида чемпионлар аниқланди

Аёллар ўртасидаги жуфтлик мусобақасида бельгиялик Элизе Мертенс ва хитойлик Чжан Шуай ҳамкорлиги бош соврин соҳибасига айланди. Улар ҳал қилувчи финал учрашувида қозоғистонлик Анна Данилина ҳамда сербиялик Александра Крунич тандемини мағлубиятга учратиб, Australian Open 2026 чемпионлигини қўлга киритишди - 7/6(4), 6/4.

Бир соату 49 дақиқа давом этган финал баҳсида Мертенс/Чжан жуфтлиги 2 та эйс, 6 та брейкка эришиб, 5 та қўшхатога йўл қўйди. Мертенс фаолиятида учинчи бор Австралия Очиқ чемпионати чемпиони (2021 ва 2024 йилда ҳам бош соврин ютган) бўлди. Унинг "Катта Дубулға" турнирларидаги чемпионлик титуллари 6 тага етди. 

Ғолиблар 2000 рейтинг очкоси ва 900 000 Австралия доллари миқдоридаги мукофот пулига эга чиқишди. Данилина ва Крунич эса 1300 очко ҳамда 485 000 Aвстралия долларига эга бўлишди.