Биласизми? Чим устида хоккей жамоамиз жаҳон рейтингида 12-ўрингача кўтарилган

Ўзбекистон Миллий олимпия қўмитаси раиси Рустам Шоабдураҳмонов ушбу спорт бўйича Ўзбекистон терма жамоасининг режалари билан танишди. ZOOM платформасида ўтган тадбирда Ўзбекистон спорт фахрийлари кенгаши раиси Баҳодир Махистов, Спорт ўйинлари бўйича Республика олий спорт маҳорат мактаби директори Жасур Акрамов, МОҚ ҳамда Ўзбекистон чим устида хоккей федерацияси мутасаддилари, терма жамоа мураббийлари иштирок этишди.

Жамоа режалари билан айни пайтда Андижондаги йиғинда бўлиб турган мураббий Ринат Аҳмадулин таништириб ўтди. Унинг берган маълумотига кўра, 2018 йил эркаклар жамоамиз жаҳон рейтингида 12-поғонагача кўтарила олган. Ҳозир эса 55-ўринда турибди. Мураббий тайёргарлик доирасида Покистон ва Ҳиндистон каби Осиёдаги кучли жамоалар билан қўшма йиғинда иштирок этиш режалаштирилаётганини таъкидлади. Ўз навбатида МОҚ раиси ушбу спортни юртимизда янада оммалаштириш бўйича фикрларини билдириб ўтди.

“Ҳукуматимизнинг қўллаб-қувватлаши билан Яшнобод туманида чим устида хоккейга ихтисослашган майдон қурилмоқда. Насиб қилса, уни замонавий инвентарлар билан жиҳозлаб, жамоамизни йирик мусобақаларда иштирок этишини таъминлаймиз. Ўз навбатида, мураббийларимиздан карантин талабларига риоя қилган ҳолда ўқув-машғулот йиғинларини давом эттиришларини сўраб қоламиз. Шунингдек, селекция ишларига ҳам алоҳида аҳамият қаратиш зарур. Мураббийларимиз Покистон ва Ҳиндистон мактабларининг кучли методикасини ўрганишсин. Бу спортда бизнинг ҳам ўз мактабимиз бор. Энди уни ҳозирги замонга мослаштириб олишимиз керак”, – деди МОҚ раиси.

Суҳбат давомида Ринат Аҳмадулин пойтахтимизда чим устида хоккей билан шуғулланадиган ҳеч бир ҳаваскорлар клуби ёки жамоаси йўқлигини таъкидлади. МОҚ раиси ушбу спортни аҳоли ва ёшлар орасида оммалаштириш учун турли мусобақалар ўтказиш зарурлигини таъкидлади. Бунинг биринчи намунаси сифатида “Наврўз” байрами арафасиданоқ турли тадбирлар ўтказиш бўйича кўрсатма берилди.