Breaking news. Фрэнсис Нганну ММАга қайтмоқда!

Ўтган йили PFL лигаси билан шартнома имзолаган аралаш яккакураш устаси октагонни соғинган кўринади. У 24 февраль куни Саудия Арабистонининг Ар-Риёд шаҳрида ўтказиладиган Райан Бейдер ва Хенан Феррейра ўртасидаги жанг ғолибига қарши октагонга чиқади. Бу ҳақда ташкилот бош директори Питер Мюррей расман хабар берди.

"PFL лигаси Фрэнсис Нганнунинг ММАга қайтаётганини катта хурсандчилик билан эълон қилади. У оғир вазнда амалдаги Bellator чемпиони Райан Бейдер ҳамда PFL лигаси камари соҳиби Хенан Феррейра ўртасидаги супержанг ғолиби билан тўқнаш келади. Фрэнсис – ҳақиқий аралаш яккакураш маъбудаси. Унинг бутун дунёда мухлислари бор. Бейдер ёки Феррейра? Биз Нганнунинг рақиби ким бўлишини сабрсизлик билан кутамиз", - деди PFL раҳбари. 

Ўз ўрнида Фрэнсис Нганнунинг ўзи ҳам ESPN каналига берган интервьюсида бу хабарни тасдиқлади. Ҳозирча "Даҳшат"нинг жанги санаси ва манзили ҳақида ҳеч қандай маълумот йўқ. Шуниси аниқки, унинг рақиби Бейдер ёки Феррейра бўлади. Айни пайтда камерунлик собиқ чемпион 8 март куни Ар-Риёдда Энтони Жошуага қарши ўтказиладиган бокс жангига тайёргарлик кўрмоқда. 

Эслатиб ўтамиз, ўтган йилнинг октябрь ойида Нганну профессионал боксда дебют қилган ва 10 раунд тўлиқ давом этган жангда ҳакамларнинг айри қарори билан Тайсон Фьюрига ютқазганди. Учинчи раундда Фрэнсис амалдаги чемпионни нокдаун ҳолатига ҳам тушириб қўйганди.