Бугун Истомин янги мавсумдаги илк учрашувини ўтказади

Мукофот жамғармаси 589 680 долларни ташкил қилувчи ATP 250 турнирида мамлакатимизнинг биринчи ракеткаси Денис Истомин ҳам иштирок этади. Бугун ҳамюртимиз асосий тўрнинг илк давра баҳсида Симоне Болеллига қарши кортга чиқади. Италиялик теннисчи саралашда икки рақибини мағлуб этиб, асосий тўрга йўлланма олган. 

Таққослаш учун, Денис Истомин дунё рейтингида 92, Болелли эса 141-ўринни эгаллаб турибди. Теннисчилар шу кунгача ўзаро ўйинда тўқнаш келишмаган. Уларнинг илк учрашуви бугун Тошкент вақти билан соат 14:30да бошланиши белгилаб қўйилган. 

Маълумот учун, Жанубий Африка Республикаси вакили Кевин Андерсон турнирнинг биринчи ракеткаси сифатида ҳаракат қилади. Истомин ва Андерсоннинг йўллари чорак финалда кесишади. Бунинг учун уларнинг ҳар иккиси ҳам ўз учрашувларида ғалаба қозонишлари шарт.

Турнирда чемпион бўлган теннисчи ўз ҳамёнини 90 990 долларга бойитиб олади, шунингдек 250 рейтинг очкосига ҳам эга бўлади. Биринчи раундда кортга чиққан теннисчиларнинг бари натижадан қатъий назар 5 320 долларлик бўлишади.