Бугун хет-трик қайд этган Дэвид 60 йилдан сўнг ушбу натижага эришган илк футболчи бўлди

Тошкент вақти билан 19 июнга ўтар кечаси жаҳон чемпионати гуруҳ босқичи доирасида Канада — Қатар учрашуви бўлиб ўтди. "В" гуруҳидан ўрин олган ушбу баҳс Ванкувердаги (Канада) "Би-Си Плэйс" стадионида ўтказилди ва канадалик футболчиларнинг 6:0 ҳисобидаги йирик ғалабаси билан якунланди.

Ғолиблар таркибида ҳужумчи Жонатан Дэвид хет-трик расмийлаштирди.

Шу тариқа, Дэвид 1966 йилдан буён жаҳон чемпионатларида мезбон мамлакат терма жамоаси сафида хет-трик қайд этган илк футболчи бўлди. Бу дунё биринчиликлари тарихидаги атиги олтинчи шундай ҳолатдир.

Бундан ташқари, у 1930 йилдан бери КОНКАКАФ (Шимолий ва Марказий Америка) минтақасидан жаҳон чемпионати баҳсларида хет-трик муаллифига айланган биринчи футболчига айланди. Ўшанда ушбу натижани америкалик Берт Патено қайд этган эди.