Чирчиқда баскетбол бўйича вилоят биринчилиги ўтказилди + ФОТО

Тошкент вилояти жисмоний тарбия ва спорт бошқармаси ташаббуси ва вилоят баскетбол федерацияси ҳамда Чирчиқ шаҳар жисмоний тарбия ва спорт  бўлими ҳамкорлигида ташкил этилган вилоят биринчилигида Янгийўл, Нурафшон, Ангрен, Чирчиқ шаҳарлари, Бустонлиқ тумани жамоалари иштирок этишди.

Мусобақа Ўзбекистон Республикаси Президентининг “Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида”ги ПФ-6099 -сонли Фармони ижросини таъминлаш, баскетбол спорт турини Тошкент вилояти миқёсида янада ривожлантириш, уюшмаган аҳоли ва ёшларни спортга бўлган қизиқишларини орттириш, вилоят ва мамлакат биринчиликларида иштирок этувчи ўсмирлар терма жамоасини шакллантириш мақсадида ўтказилди.

Муросасиз ўтган беллашувларнинг якуний натижаларига кўра, Бўстонлиқ тумани жамоаси фахрли биринчи ўринни қўлга киритди. Иккинчи ўринни Ангрен жамоаси эгаллаган бўлса, учинчи ўрин Чирчиқ шаҳри жамоасига насиб этди.

Алишер НОРМЕТОВ, Чирчиқ шаҳар жисмоний тарбия ва спорт бўлими в.б. бошлиғи: - Баскетбол бўйича ўтказилган ушбу мусобақа ҳам аҳоли, айниқса, ёшларни жисмоний тарбия ва спортга янада кўпроқ жалб этиш, қолаверса, вилоят терма жамоасига муносиб спортчиларни саралашдан иборат бўлади. Албатта, бу каби спорт беллашувларининг юқори савияда ўтишида Тошкент вилояти жисмоний тарбия ва спорт бошқармаси бошлиғи Комилжон Адиловга спортчиларимиз номидан миннатдорчилик билдирамиз. Қолаверса, бугунги беллашувда спортчиларни тақдирлашда иштирок этган вилоят жисмоний тарбия ва спорт бошқармасининг олий спорт ютуқлари ва саралаш (селекция) бўлими бошлиғи Ойбек Тошпўлатов, оммавий ва болалар спортини ривожлантириш бўлими бошлиғи Усмонжон Каримов, Ўзбекистон миллий олимпия қўмитаси Тошкент вилояти бўлими вакили Азамат Туроповлар ҳам жамоаларнинг ўйинларини кўзатиб боришди. Кузатиш жараёнида ҳакамлар ва мураббийлар иштирокида иқтидорли баскетболчиларни саралаш хусусида фикрлашишди. Мусобақа якунида бошқарма вакиллари ғолиб ва совриндор жамоаларни Тошкент вилояти жисмоний тарбия ва спорт бошқармаси томонидан таъсис этилган диплом, медаль ва эсдалик совғалари билан мукофотлашди.

Илҳом РАҲМОНОВ тайёрлади