Cвитолина икки йиллик танаффусдан сўнг соврин ютди + ФОТО

Мусобақа бош соврини Элина Свитолинага насиб этди. Украиналик теннис маликаси ҳал қилувчи финал учрашувида WTA рейтингида 39-поғонани эгаллаб турган сербиялик Ольга Даниловичдан 6/4, 7/6(8) ҳисобида устун келди. Дунёнинг 18-ракеткаси бўлиб турган Элина икки йиллик танаффусдан сўнг яна WTA совринига эга чиқди. 

Бу теннисчиларнинг ўзаро ўтказган илк учрашуви бўлди. Бир дақиқаси кам икки соат давом этган баҳсда Свитолина 6, Данилович 5 та эйс зарбасини амалга оширган. Иккала теннис маликаси ҳам 3 тадан қўшхатога йўл қўйди. Брейклар бўйича устунлик Элина томонида бўлди - 3 га 2. 

Украиналик сўнгги бор 2023 йилнинг май ойида Франциянинг Страссбург шаҳрида WTA совринини қўлга киритганди. Бу унинг фаолиятидаги 18-соврин бўлди. Свитолина Руандаги муваффақиятли иштирокидан 250 рейтинг очкоси ҳамда 31,565 евро мукофот пули ишлаб олди.