Цзю иштирокидаги жанг бешинчи раундда якунланди

Newcastle Entertainment Centre аренасида ўтган Steel City Showdown оқшомининг марказий жанги австралиялик Тим Цзю ҳамда ирландиялик Деннис Хоган ўртасида ўтказилди. Тим биринчи ярим ўрта вазнда собиқ мутлақ жаҳон чемпиони Константин Цзюнинг ўғли бўлиб, чемпионларга ҳақиқий бошоғриғи бўлиши кутилмоқда. 

Жанг муддатидан аввал якунланди. Кичик Цзю бешинчи раундда рақибини техник нокаутга учратди. Хоганнинг жамоаси ринг марказига мағлубиятни тан олувчи оқ сочиқ улоқтиришди. Бу билан Цзю ўзига тегишли бўлган биринчи ўрта вазндаги WBO Global камарини муваффақиятли ҳимоя қилди. Тимофей бугунги ғалабаси эвазига WBO камари учун расмий даъвогарга айланди. Ҳозирда бу камар Брайан Кастаньога тегишли. 

Маълумот учун, кичик Цзю IBF йўналиши бўйича Австралия ва Осиё чемпиони ҳам бўлиб турибди. 26 ёшли боксчи 18 та жангнинг барчасида ғалаба қозонган. Ҳисобида 14 та нокаут бор.