Давлат Бобонов: "Энг катта ютуғимиз - авлодлар алмашинуви"

Дзюдочимиз қисқа интервьюси давомида авлодлар алмашинуви, Ўрозбоевнинг допинги ва Париж Олимпиадасига тайёргарлик ҳақида гапириб ўтди.

- Ҳозирги ўзбек дзюдосидаги энг катта ютуқ деб айнан қайси жиҳатни кўрсата оласиз?

- 2021 йилдаги энг катта ютуғимиз менимча, бу терма жамоада авлодлар алмашинуви бўлганидир. Чунки Ришод Собиров, Абдулла Тангриевлар авлодидан сўнг бундай таркиб ҳозиргача чиқмаган эди.

- Диёрбек Ўрозбоевда аниқланган допинг, ўзи умуман спортчиларда аниқланётган допинг ёки бошқача қилиб айтганда, спортда допингга қандай муносабат билдирасиз?

- Менимча, допинг бу спортчи ўзини кўрсатиши учун тўсқинлик. Қолаверса, спортчи халқ меҳрини қозониши учун ҳам асосий тўсқинлик қилувчи восита ҳисобланади.

- Биламизки, деярли ҳар бир Олимпиадада дзюдо спорт туридан камида битта медаль қўлга киритамиз. Париж олимпиадасида ҳам мухлислар сизлардан юқори натижалар кутиши табиий. Навбатдаги Олимпиада учун тайёргарликлар қай даражада, Париж 2024 учун тайёргарлик бошландими?

- Парижда бўлиши кутилаётган Олимпиада учун тайёргарлик авжида, қайсидир маънода ўйинлар учун тайёргарлик  ҳозирдан бошланган десак ҳам бўлади. Ёздаги Олимпиададан сўнг жаҳон чемпионатида ҳам муваффақиятли иштирок этдик. Январда ҳам бир қатор мусобақалар бўлиб ўтиши режалаштирилган, бунда ҳам насиб қилса муваффақиятли қатнашамиз. Бундан ташқари, яқинда беш-олти жамоа ичидан ПСЖни танлаган ҳолда ушбу клуб сафига ўтдим.

- Давлат Бобонов дзюдодаги фаолиятини якунлаганидан сўнг сир бўлмаса, айнан қайси соҳада фаолият юритиши мумкин? Айтмоқчиманки, Ришод Собиров ўз фаолиятини якунлаганидан кейин ҳам дзюдодан узоқлашгани йўқ. Сизда бу борада режалар қандай?

- Тўғрисини айтсам, бу ҳақида ҳали ўйлаб кўрмабман (кулади).

- Давлат ака келгуси мусобақаларда, ишларда омад, жавобларингиз учун раҳмат.

- Сизга ҳам раҳмат, фаолиятингизда омад.