Деонтей Уайлдер қайтди, унинг иштирокидаги жанг тўлиқ давом этди

Оқшом доирасидаги қизиқарли жанглардан бири супероғир вазн тоифасида ўтказилиб, унда америкалик собиқ WBC чемпиони Деонтей Уайлдер британиялик 42 яшар Дерек Чисорага қарши рингга кўтарилди. Дерек WBC камари учун 10 йиллик тафовут билан 2012 ва 2022 йилларда даъвогарлик қилганини ҳам эслатиб ўтиш жоиз. 

Фахрийлар ўртасидаги жанг тўлиқ 12 раунд давом этди ва якунда Уайлдер ҳакамларнинг айри қарори билан ғалаба қозонди. Ҳакамларнинг икки нафари 115-111, 115-113 ҳисобларидаги ғалабани Деонтейга тақдим этди. Учинчи ҳакам эса 115-112 ҳисобида Дерек ғалаба қозонди деб ҳисоблади. 

Эътиборга молик яна бир статистик маълумот шуки, ҳар икки боксчи ҳам профессионал боксдаги фаолиятларида ўзларининг юбилей 50-жангларини ўтказишди. Уайлдер бундан аввалги жангини 2025 йилнинг июнь ойида Тайррелл Херндонга қарши ўтказган ва ғалаба қозонганди. Бу билан у ўзининг икки мағлубиятли сериясини ёпиб кетганди. Чисора эса аксинча кеча тунда ўзининг учта ғалабали сериясини тўхтатди. Дерек Жеральд Вашингтон, Жо Жойс ва Отто Валлинни таслим этган эди.