Файзиев Қозон турнирининг ярим финалига йўл олди

Мукофот жамғармаси 25 000 АҚШ долларини ташкил қилувчи мусобақанинг асосий тўр баҳсларида уч нафар теннисчимиз - Санжар Файзиев, Ҳумоюн Султонов ҳамда Сергей Фомин ҳам иштирок этяпти. Улардан яккалик турнирида биргина Санжар Файзиев ғолибона юришини давом эттиряпти.

Файзиев ҳозиргина якунига етган чорак финал учрашувида россиялик Александр Василенкони уч сет натижасига кўра таслим этди. Икки соату 34 дақиқа давом этган баҳс якунида теннисчимиз рақибидан 3:6, 6:4, 6:2 ҳисобида устун келди.

Санжарнинг ярим финалдаги рақиби яна бир рус теннисчиси Евгений Тюрнев бўлади. Турнирда еттинчи рақам остида таснифланган Тюрнев бугун чорак финалда мусобақанинг биринчи ракеткаси беларуслик Сергей Бетовни 6:3, 6:1 ҳисобида енгди.