Геннадий Головкин "жангсиз" World Boxing президенти бўлди

Унда ташкилотга янги раҳбар сайланди. Ўрта вазн тоифасида собиқ жаҳон чемпиони Геннадий Головкин кутилганидек World Boxing ташкилотини бошқардиган бўлди. Овоз беришга фақатгина битта номзод қўйилди. Сайлов рақобатдан ҳоли ўтди. Қозоғистон миллий олимпия қўмитаси президенти иккинчи муддатга номзодини қўймаган нидерландиялик Борис ван дер Ворстнинг ўрнини эгаллади.

"Менинг миссиям бокснинг Олимпия келажагини сақлаб қолиш, ишончни мустаҳкамлаш ва спортчиларни, мураббийларни, федерацияларни спортимизни ривожлантиришга бўлган интилишларида қўллаб-қувватлашдан иборат.

Мақсадимиз: Халқаро Олимпия Қўмитаси томонидан тўлиқ эътироф этилишига эришиш ва Олимпия ўйинларида: Лос-Анжелес-2028, Брисбен-2032 ва ундан кейинги йилларда боксни сақлаб қолиш", - деди 43 ёшли Головкин.

Маълумот учун, 2025 йил бошида World Boxing ташкилоти Халқаро Олимпия қўмитаси (ХОҚ) томонидан тан олинган эди.