Ғолиб учун 30 миллион сўм. Пойтахтимизда Халқаро марафон ўтказилади

Ўзбекистон Жисмоний тарбия ва спорт вазирлиги, Миллий олимпия қўмитаси, Енгил атлетика федерацияси, Тошкент шаҳар ҳокимлиги ҳамда Ўзбекистон ташқи ишлар ишлар вазирлиги, Ахборот технологиялар ва коммуникацияларни ривожлантириш вазирлиги, Энергетика вазирлиги, Соғлиқни сақлаш вазирлиги, Туризмни ривожлантириш давлат қўмитаси, Миллий телерадиокомпания, Миллий ахборот агантлиги, Енгил атлетика республика олий спорт маҳорат мактаби кўмагида 22-март куни “I Тошкент Халқаро марафони” бўлиб ўтади.

Марафонни ўтказишдан мақсад юртимизда соғлом турмуш тарзини тарғиб қилиш, аҳолини жисмоний тарбия ва спорт билан мунтазам шуғуллантириш, халқаро дўстона спорт алоқалари ва туризмни ривожлантириш, кучли марафончиларни аниқлаб олиш, пойтахтнинг оммавий спорт тадбирларини ўтказиш имкониятларини кенгайтириш, яқин ва узоқ хорижий давлатлардан спортчи ҳамда сайёҳларни жалб этишдан иборатдир.

Мусобақалар қуйидаги масофaларда ўтказилади:

Эркаклар ва аёллар ўртасидаги марафон - 42 км 195 м

Эркаклар ва аёллар ўртасидаги ярим марафон - 21,097.5 м

Эркаклар ва аёллар ўртасида пойга - 3 км

Эркаклар ва аёллар ўртасида пойга - 1,5 км

Старт-финиш нуқтаси “Бешёғоч” майдончасидаги “Бешёғоч” ва “Афросиёб” чорраҳаси (мўлжал - “Ҳумо Арена” муз саройи)да жойлашган. 

Марафон ва ярим марафон иштирокчиларининг тўпланиш вақти 6:40 да, марафонга эса 7:00 да старт берилади.

1,5 км пойгачилар тўпланиш вақти 7:05да, бошланиш вақти 7:10да.

3 км пойгачилари майдончага 7:25гача келсалар, 7:30да пойгага старт берилади.

Ҳар бир иштирокчи битта масофада қатнашиши мумкин. Марафон ва ярим марафон иштирокчилари 18 ёш ва ундан катта эркаклар ва аёллар (2002-йилда ва ундан аввал туғилганлар) ўртасида бўлса, 3 ва 1,5 км пойгаларда қатнашувчилар ёши чекланмаган. “I Тошкент Халқаро марафони”да иштирок этишни хоҳловчилар 10 февраладан 15 мартгача www.uzmarathon.uz сайтида рўйҳатдан ўтишлари талаб этилади. Марафонда қатнашиш учун йўлланма - “Иштирокчилар пакети”ни олиш учун сиз шахсий қабул маркази (Тошкент ш, И.Каримов кўчаси 98а, Енгил атлетика федерацияси. Тел: 71 2411381, 71 2411364) га 19-20-21-март кунлари 10:00дан 20:00гача ташриф буюриб шахсингизни тасдиқловчи ҳужжатни тақдим этишингиз керак.

Хўш сиз бу марафонда қатнашиб нимага эришасиз?

Мукофот пуллари;

Марафон:                           Ярим марафон: 

1-ўрин - 30 млн сўм          1-ўрин - 12 млн сўм 

2-ўрин - 20 млн сўм          2-ўрин - 10 млн сўм

3-ўрин - 10 млн сўм          3-ўрин - 8 млн сўм

4-ўрин - 8 млн сўм            4-ўрин - 7 млн сўм

5-ўрин - 7 млн сўм            5-ўрин - 6 млн сўм

6-ўрин - 6 млн сўм            6-ўрин - 5 млн сўм

7-ўрин - 5 млн сўм            7-ўрин - 4 млн сўм    

8-ўрин - 4 млн сўм            8-ўрин - 3 млн сўм.

3 км.га пойга:                   1,5 км.га пойга:

1-ўрин - 3 млн сўм           1-ўрин - 3 млн сўм

2-ўрин - 2 млн сўм           2-ўрин - 2 млн сўм

3-ўрин - 1 млн сўм.          3-ўрин - 1 млн сўм.

Марҳамат, иштирок этинг, жисмоний имкониятларингиз чегарасини аниқлаб олинг ва совринли ўринларга эга бўлинг. Агар финишга ҳаммадан охири бўлиб етиб келганингизда ҳам сиз ютқазмайсиз! Саломатлигингиз учун мускулларингизни бир кун кўпроқ ҳаракатлантирган бўласиз, холос!

Қайд этиш лозимки, ўтган йили пойтахтимизда халқаро ярим марафон муваффақиятли ташкил этилганди. Бу йил эса катта марафон ташкил этиш мақсад қилинган. 

uzathletics.uz сайти асосида САРВИНОЗ РАХМОНҚУЛОВА тайёрлади