Grand Chess Tour: Синдаров 6-турда пешқадамлардан бири Каруана билан ўйнади

Дунёнинг кўзга кўринган гроссмейстерлари иштирок этаётган турнир классик шахмат йўналишида 9 турдан иборат айланма тизимида ўтказиляпти. Жавоҳир Синдаров ҳали ғалаба қозонгани йўқ. У шу кунгача ўтказилган олтита учрашувнинг бештасида рақиблари билан дуранг ўйнаб, битта партияда мағлубият аламини тотиб кўрди. 

Жавоҳир кеча олтинчи турда пешқадамлардан бири америкалик Фабиано Каруанага қарши оқ доналарда ўйнаб, дурангга имзо чекди. Бу турдаги ягона ғалабани Аниш Гири қайд этди. Нидерландиялик гроссмейстер ватандоши Йорден ван Форестдан устун келди. Қолган партияларда дуранг натижа қайд этилди. 

Еттинчи тур олдидан турнир жадвалида америкалик Уэсли Со 4 очко билан якка пешқадам бўлиб турибди. Фабиано Каруана, Винсент Кеймер, Рамешбабу Праггнанандҳа ва Максим Вашье-Лаграв 3,5 очко билан Топ-5`дан жой олган. Левон Аронян, Сэм Севьян ҳисобида 3 очкодан бор. Жавоҳир Синдаров 2,5 очко билан қўшимча кўрсаткичларга кўра 8-поғонани банд этган. Аниш Гири ҳисобида ҳам 2,5 очко бор. Бир очкога эга Йорден ван Форест сўнгги 10-ўринда бормоқда.   

Бугун 7-турда Жавоҳир Синдаров қора доналарда германиялик Винсент Кеймерга қарши баҳс олиб боради. Бугунги учрашувлар ҳам бизнинг вақт билан соат 22:00да бошланади. 

Тўлиқ иштирокчилар таркиби: Жавоҳир Синдаров (Ўзбекистон), Фабиано Каруана (АҚШ), Прагнанандҳаа Рамешбабу (Ҳиндистон), Уэсли Со (АҚШ), Левон Аронян (АҚШ), Аниш Гири (Нидерландия), Винсент Кеймер (Германия), Максим Вашье-Лаграв (Франция), Йорден ван Форест (Нидерландия), Сэм Севьян (АҚШ).