Grand Swiss. Синдаров Аронянни мағлуб этди, Каруана билан қора доналарда дуранг ўйнади

Мусобақанинг умумий мукофот жамғармаси 600 000 (460 000 эркаклар, 140 000 аёллар турнири учун) АҚШ долларини ташкил этиб, унда дунёнинг 164 (114 эркак, 50 аёл шахматчилари) нафар гроссмейстерлари ғолиблик йўлида дона суришяпти. Улар қаторида ёш гроссмейстерларимиздан Нодирбек Абдусатторов, Жавоҳир Синдаров, Нодирбек Якуббоев ва Шамсиддин Воҳидовлар ҳам совринли ўринлар учун баҳс олиб боришмоқда. 

Мусобақа швейцарча тизимда ўтказилаётган бўлиб, бугунгача 5 та тур партиялари ўйналди. Бугун ўтказиладиган 6-тур олдидан ҳамюртларимиздан Жавоҳир Синдаров ва Нодирбек Якуббоев Топ-10`таликда боришмоқда. Уларнинг ҳар иккиси ҳам 3,5 очкодан жамғарган. 

Кеча ўтказилган 5-турда Жавоҳир Синдаров (2658) оқ доналарда рейтингда ўзидан юқорида турган хитойлик Ю Янг Йи (2720) билан дуранг ўйнади. Нодирбек Якуббоев (2616) қора доналарда ҳаракат қилганига қарамай, рейтингда ўзидан юқорида жойлашган швециялик гроссмейстер Нилс Гранделиусни мағлубиятга учратди. 

Биринчи рақамли шахматчимиз Нодирбек Абдусатторов (2716) бу турда қора доналарда арманистонлик Грант Мелкумян (2650) билан муросага келди. Шамсиддин Воҳидов (2578) эса қора доналарда грециялик Николас Теодороу (2619) билан дурангга имзо чекди. 

Эътиборга молик жиҳати шундаки, Жавоҳир Синдаров ҳали мағлубиятга учрагани йўқ. У 3-турда арманистонлик Леван Аронянни мағлубиятга учратиб, 4-турда биринчи доскада мусобақада биринчи рақам остида сараланган америкалик Хикару Накамура билан қора донаарда дуранг ўйнади. 

Бугун ўтказиладиган 6-тур жуфтликлари:

Нодирбек Якуббоев (2616) - Винсент Кеймер (Германия, 2717)

Самуэль Севиан (АҚШ, 2698) - Жавоҳир Синдаров (2658)

Нодирбек Абдусатторов (2716) - Читамбарам Аравиндҳ (Ҳиндистон, 2649)

Шамсиддин Воҳидов (2578) - Макс Вармердам (Нидерландия, 2636)