Икки ҳафта давом этган Рим "Мастерс" турнирида чемпион аниқланди

Бир кун олдин Рим турнирининг аёллар ўртасидаги мусобақасида италиялик Жасмине Паолини бош совринни қўлга киритганди. Рим "Мастерс" турнирида ҳам мезбон теннисчи чемпионга айланиши ва бу билан бахт тўкис бўлиши мумкин эди. Лекин бунга испаниялик Карлос Алькараз рози бўлмади.

Ҳал қилувчи финал учрашувида ATP рейтингида учинчи ўринни эгаллаб турган Карлос Алькараз дунёнинг биринчи ракеткаси Янник Синнерга қарши кортга чиқди. Бир юз беш дақиқа давом этган баҳсда Алькараз 7/6(5), 6/1 ҳисобида зафар қучди. Уч ойлик четлатишдан сўнг ўзининг илк мусобақасини ўтказган Янник иккинчи сетда рақибига қаршилик кўрсата олмади.  

Карлос Алькараз Янник учун ноқулай рақиб бўлиб қолмоқда. Теннисчиларнинг ўзаро учрашувлари ҳисобида испаниялик олдинда бормоқда - 8:4. Алькараз 4, Синнер 1 та эйс зарбасини амалга оширган. Қўшхатолар Янникда кўпроқ бўлди - 3 га 2. Брейклар бўйича устунлик эса табиийки ғолиб теннисчи томонида - 2 га 0. 

Бу Карлос Алькараснинг мавсумдаги учинчи, фаолиятидаги 19-соврин бўлди. Испаниялик жорий мавсумда Монте-Карло "Мастерс" ҳамда Роттердамдаги ATP 500 турнирларида ҳам бош совринга эга чиққанди.