Иккинчи ракеткамиз Мария Тимофеева "Ролан Гаррос"даги юришини бошлади

Қувонарлиси, Ўзбекистоннинг иккинчи ракеткаси Мария Тимофеева нуфузли мусобақадаги иштирокини нисбатан енгил ғалаба билан бошлаб олди. Саралаш баҳсларида 24-рақам остида таснифланган Мария илк босқичда Канада вакиласи Кадено Брейсни 6/1, 6/3 ҳисобида мағлубиятга учратди. 

Таққослаш учун, Тимофеева айни пайтда WTA рейтингида 119, Брейс эса 202-ўринни эгаллаб турибди. Етмиш бир дақиқа давом этган баҳсда иккала теннисчи ҳам 4 тадан қўшхатога йўл қўйди. Мария 2 та эйс зарбасини амалга оширди, рақибасида эса бу кўрсаткични нолни ташкил қилди. Бу теннисчиларнинг ўзаро ўтказган илк учрашуви бўлди. 

Бугун Тимофеева саралашнинг 1/2 финалида Мария Лурдес Карлега қарши кортга чиқади. Аргентиналик бу теннисчи дунёнинг 209-ракеткаси бўлиб турибди. Тимофеева - Карле учрашуви бизнинг вақт билан соат 19:00да бошланади.