Иккинчи ракеткани мағлуб этган Фомин финалга йўл олди

Мукофот жамғармаси 15 000 АҚШ долларини ташкил этувчи ушбу мусобақада ҳамюртимиз Сергей Фомин ҳам муваффақиятли одимлаяпти. Бироз аввал мамлакатимизнинг иккинчи ракеткаси иштирокидаги 1/2 финал учрашуви якунига етди. Дунёнинг 642-ракеткаси бўлиб турган Фомин турнирнинг иккинчи ракеткаси, ATP рейтингида 507-поғонада бораётган россиялик Евгений Тюрневга қарши баҳс олиб борди.  

Уч сет давом этган қийин учрашувда Фомин кучли рақиби устидан иродали ғалабага эришди. Биринчи сетни 3/6 ҳисобида бой берган Сергей кейинги икки сетда 7/6(0), 6/4 ҳисобларида зафар қучиб, финалга йўл олди. 

ATP рейтингида 642-поғонадан жой олган ҳамюртимиз эртага бош соврин учун яна бир рус теннисчиси Бекхан Атлангериевга қарши кортга чиқади. ATP рейтингида 2066-ўринда бораётган Бекхан бугун турнирнинг 8-ракеткаси, ҳиндистонлик Каран Сингҳни 6/3, 6/4 ҳисобида таслим этди.