Ишчи гуруҳ Навоий вилоятининг спорт инфратузилмасини ўрганмоқда

Вазирлар Маҳкамасининг Спорт ва туризмни ривожлантириш масалалари котибияти Бош мутахассиси, Ишчи гуруҳ раҳбари З.Таджибаев, Жисмоний тарбия ва спорт вазирининг ўринбосари А.Каримов, МОҚ раиси ўринбосари Ш.Ташматовлардан иборат гуруҳ ҳозирда Навоий вилоятининг бир қатор ҳудудларини ўрганиб чиқишмоқда.

Навоий мамлакатимизда ҳудуди жиҳатдан энг катта, иқтисодий салоҳияти юқори, бироқ аҳоли сони жиҳатдан пастки ўринларда турувчи ҳудуд ҳисобланади. Мутасаддилар ўрганишлар давомида бу каби жиҳатларга ҳам алоҳида эътибор қаратиб ўтишмоқда. Боиси спорт билан шуғулланувчи ёшлар баъзи ҳудудларда уйларидан машғулот залигача бир неча километр масофаларни босиб ўтиши керак. Вилоят ҳокимлиги, Жисмоний тарбия ва спорт бошқармаси мутасаддилари аҳолига қулайлик яратиш мақсадида ўша ҳудудлар учун энг қулай нуқталарда янги, замонавий спорт иншоотларини қуриш, мавжудларини таъмирлаш каби масалаларни кўриб чиқишмоқда.

Айни пайтда ишчи гуруҳ аъзолари Навоий шаҳридан ташқари вилоятнинг Қизилтепа, Томди туманларида ҳам бўлишиб, ушбу ҳудудларда спорт билан шуғулланувчилар учун яратилган шароитлар, мавжуд спорт объектлари ҳақида ўрганишлар олиб боришмоқда. Режага кўра, сафар давомида вилоятнинг чекка ҳудудларига бориш, у ерлардаги вазият билан ҳам яқиндан танишиш кўзда тутилган.