Жавоҳир Синдаров сардорлигидаги жамоа шоҳсупада, Магнус чемпион бўла олмади! (+ФОТО)

Ўз таркибига юлдуз шахматчиларни жамлаган олтита жамоа иштирокидаги мусобақа муросасиз курашлар остида ўтди. Нуфузли турнирнинг сўнгги куни чемпионлик ва учинчи ўрин учун баҳслар ўтказилди. 

Ҳамюртимиз Жавоҳир Синдаров мусобақанинг бу йилги мавсумида Fyers American Gambits жамоаси шарафини ҳимоя қилди. Жавоҳирнинг жамоасидан қозоғистонлик Бибисара Ассаубаева, россиялик Данил Дубов, ҳиндистонлик Ниҳал Сарин, франциялик Марк-Андриа Маурицци ҳамда испаниялик халқаро мастер Сара Ҳадем жой олганди. Синдаров сардор сифатида барча учрашувларини жамоасининг биринчи —  Icon тахтасида рақиб жамоаларнинг биринчи рақамли шахматчиларига қарши дона сурди.

Tech Mahindra Global Chess League турнирининг сўнгги куни Жавоҳир Синдаров бошчилигидаги Fyers American Gambits жамоаси франциялик таниқли гроссмейстер Максим Вашье-Лаграв сардорлигидаги Cheq Mumba Masters жамоасига қарши бронза медаллари учун баҳс олиб борди. Fyers American Gambits ҳар икки учрашувда ҳам ғалаба қозониб (4:2, 3,5:2,5), мусобақанинг бронза медалини қўлга киритди. 

Турнир чемпионлиги учун кечган баҳсда Магнус Карлсен бошчилигидаги Alpine Apl Pipers жамоаси Ян Непомняший сардорлигидаги Ganges Grandmasters жамоасига бироз кутилмаганда имкониятни бой бериб, кумуш медаллар билан кифояланди. Ganges Grandmasters чемпионлик шоҳсупасига кўтарилди. 

Мусобақа чемпиони Ganges Grandmasters бош соврин билан бирга 250 000 АҚШ доллари миқдоридаги мукофот пулини ҳам қўлга киритди. Кумуш медаль соҳиблари Alpine Apl Pipers жамоаси 125 000, бронза медаль эгалари Fyers American Gambits жамоаси 75 000 долларга эга чиқди. Тўртинчи ўринни банд этган Cheq Mumba Masters жамоаси 50 000 АҚШ доллари билан тақдирланди.