Камару Усман октагонга қайтяпти. У собиқ чемпионга қарши жанг ўтказади + ПОСТЕР

Нигериялик тажрибали аралаш яккакураш устаси UFC Fight Night 281 турнирининг асосий жангида октагонга чиқади. Унинг рақиби яна бир собиқ чемпион Дрикус Дю Плесси бўлади. Плесси - Усман жанги 18 июль куни Оклахомада бўлиб ўтадиган UFC Fight Night 281 турнирининг асосий воқеаси бўлади.

UFC собиқ чемпионлари ўртасидаги қарама-қаршилик аввалроқ вазиятга яқин бўлган хабардор манбалар томонидан маълум қилинганди. Бугун ушбу жанг ташкилот томонидан расман эълон қилинди.

Маълумот учун, Камару Усман сўнгги жангини ўтган йилнинг июнь ойида ўтказиб, беш раунд якунларига кўра Хоакин Баклини мағлубиятга учратган эди. Бунгача лиганинг ярим ўрта вазн тоифасида тўққизинчи ўринни эгаллаб турган нигериялик 2023 йил октябрь ойида ўрта вазн тоифасида Хамзат Чимаев билан қисқа муддатли жанг ўтказиб, кўпчилик овоз билан мағлубиятга учраганди.  

Ўрта вазн тоифаси UFC рейтингининг иккинчи рақамли жангчиси Дрикус Дю Плессси охирги марта октагонга ўтган йилнинг август ойида чиққан ва якдил қарор билан Чимаевга ютқазиб, чемпионлик камарини бой берганди. Бунгача жанубий африкалик ташкилотда мағлубиятсиз одимлаган, у кетма-кет тўққиз марта ғалаба қозонган ва икки марта чемпионлик камарини муваффақиятли ҳимоя қилган.