Карлос Алькараз Мадрид "Мастерс"да чемпионлик ҳимоясига киришди

Испаниялик теннисчи ушбу нуфузли мусобақанинг амалдаги чемпиони ҳисобланади. Тўғридан-тўғри иккинчи даврадан баҳсларга қўшилган Карлос ATP рейтингида 59-ўринни эгаллаб турган қозоғистонлик Александр Шевченкони ортиқча қийинчиликсиз мағлубиятга учратди - 6/2, 6/1. 

Теннисчиларнинг ўзаро илк учрашуви 69 дақиқа давом этган. Иккала теннисчи ҳам бу баҳсда эйс зарбасини амалга ошира олмаган. Қизиғи, теннисчилар қўшхатога ҳам йўл қўйишмади. Брейклар табиийки, Алькаразда кўпроқ бўлди - 7 га 2! 

Таъкидлаш жоиз, испаниялик теннисчи жароҳатидан кейин илк учрашувини ўтказди. Қўлидаги жароҳат сабабли у Монте-Карло ва Барселонадаги турнирларни ўтказиб юборди. Энди у Mutua Madrid Open турнирининг учинчи даврасида Тьяго Зайбот Вилдга қарши кортга чиқади. Бразилиялик теннисчи иккинчи босқичда италиялик Лоренцо Музеттидан 6/4, 6/4 ҳисобларида устун келди.