Касбидаги спорт мактабида кутубхона иш бошлади

Боиси, Касби туман болалар-ўсмирлар спорт мактаби жаоаси Қашқадарё вилоятидаги БЎСМлар орасида биринчилардан бўлиб ўз ҳудудида кутубхона ташкил этди. Қашқадарё вилоят Туризм ва спорт бошқармаси тасарруфидаги мазкур болалар-ўсмирлар спорт мактаби директори Фахриддин Яҳёев ташаббуси ва саъй-ҳаракатлари натижасида ушбу мўъжазгина кутубхона фаолияти йўлга қўйилди. 

БЎСМ директорининг болалигидан китобга ошно бўлиб, шахсий кутубхонасида кўплаб бадиий адабиётлар жамланган эди. Ф. Яҳёев дастлаб, ушбу китоб жамланмаларини БЎСМдаги мавжуд бўш хоналардан бирига жойлаштириб, кутубхона шаклига келтиради. Кейинчалик бу ташаббусни қўллаб-қувватловчилар ҳам кўпайиб, кўпчилик БЎСМга бадиий китоблар совға қилишади.

- Китоб мутолаасига ва уларни тўплашга жуда қизиқаман, - дейди Касби туман БЎСМ директори Ф.Яҳёев. - Шу боис қайси китоб дўконида қизиқарли китоблар кўрсам харид қилиб, ўқиб чиқаман. Шу қизиқишларим натижасида уйда анчагина китоблар тўпланиб қолган экан. Китобнинг энг ёмони ўқилмагани, деганларидек қолганлар ҳам ўқиб, маънавий озуқа олсин деган умидда мана шу кутубхонани ташкил этдик. Рости, ҳозир кўпчилик телефон, интернетга қизиқиб кетган, китобга қизиқиш кам бўлса керак дегандим. Йўқ, адашган эканман. Ҳозир китоб ўқиш истагидаги ёшларни, айниқса, машғулотлардан бўшаган ўғил-қизларимизнинг ушбу кутубхонага кириб, китоб ўқиётганини кўриб, ҳайратда қолдим ва бошлаган ишимиз бесамар кетамаганлигидан мамнун бўлдик. Ҳатто, яқин атрофдаги маҳалла одамлари ҳам китоб ўқиш учун келишаётгани янаям қувонарли.

Ҳозирда икки мингдан ортиқ миллий ўзбек адабиёти ҳамда жаҳон адабиётига, қолаверса, болалар адабиёти мансуб бадиий китоблар билан бойитилган кутубхонани БЎСМ маъмурияти тез орада янада кенгайтириш ҳаракатида экан. 

Ҳа, яхши китоб инсонда Ватанга муҳаббат, миллий ва умуминсоний қадриятларга ҳурмат туйғуларини юксалтириб, яхшилик ва эзгулик сари етаклайди. Демак, Касбидаги ушбу болалар-ўсмирлар спорт мактабида машғулотларга зўр бераётган ўғил-қизлар ҳам ўзлари учун яратилган кутубхонада китоб мутолаа қилган сари маънавияти юксалиб, туғилган манзил-маконига, Юртига меҳр-муҳаббатли, орияти баланд, ғурури осмон каби комил инсон бўлиб вояга етишига шубҳа йўқ!    

Илҳом РАҲМОНОВ тайёрлади