Кудерметова рейтингда ўзидан юқоридаги рақибасини 47 дақиқада сочиб ташлади

У бугун тонгда Канберра шаҳрида ўтказилаётган WTA 125 тоифасига кирувчи турнирнинг 1/4 финал босқичида ҳам ғалабага эришди. 22 яшар Полинага чорак финал босқичида хитойлик 27 ёшли Юань Юэ рақиблик қилди. 

Бор йўғи 47 дақиқа давом этган учрашувда Чин юрти вакиласини 6/1, 6/0 ҳисобида мағлубиятга учратди. Бу теннисчиларнинг ўзаро ўтказган иккинчи учрашуви бўлди. Уч йил аввал Нидерландияда ўтган илк баҳсда ҳам Кудерметова ғалаба қозонганди. Бугунги учрашувда Полина 2, Юань 1 та эйс зарбасини амалга оширган. Қўшхатолар бўйича хитойлик теннисчи мутлақ устунлик қилди - 3 га 0.  

Маълумот учун, Полина Кудерметова айни пайтда WTA рейтингида 167, Юань Юэ эса 135-ўринни эгаллаб турибди. Турнирда учинчи рақам остида таснифланган теннисчимизнинг 1/2 финалдаги рақибаси айни дақиқаларда давом этаётган учрашувда аниқланади.