Лиана Жожуа UFCдан четлатилганидан кейинги режалари ҳақидаги саволга жавоб берди

Эслатма учун, ўтган йилнинг ноябрь ойи ўртларида Жожуанинг UFCдан четлатилгани маълум қилинганди.

«Мен ҳозир соғлиғимни тиклаш ва дам олиш билан бандман. Шундай экан, биз турли лигаларнинг таклифини қабул қилишимиз мумкин. Ўйлайманки, мен ҳам пандемиядаги икки йилни бошқалар каби қийин ўтказдим. Ҳар бир инсон кўпгина муаммоларга дуч келди», — деб жавоб берди Лиана ўз инстаграм саҳифасида.

Лиана UFCдаги сўнгги жангини АҚШ вакиласи Кортни Кейсига қарши ўтказди. Жанг UFC Vegas 42 турнири доирасида ўтказилди. Қарама-қаршилик уч раунд давом этди, унда ҳакамларнинг умумий қарорига кўра америкалик жангчининг ғалабаси қайд этилди. Бу Жожуа учун кетма-кет иккинчи мағлубият бўлди. 2020-йил октябрида у яна бир америкалик жангчи Миранда Меверикка мағлубиятга учраган эди.