Miami Open. 30 ёшли Даниэль Коллинз бош соврин соҳибаси!

Ҳал қилувчи финал учрашувида WTA рейтингида 53-ўринни эгаллаб турган америкалик Даниэль Коллинз дунёнинг тўртинчи ракеткаси, ўтган йилги турнир вице-чемпиони, қозоғистонлик Елена Рибакинага қарши кортга чиқди. Икки соату икки дақиқа давом этган баҳсда Коллинз номдор рақибасини мағлуб этишни уддалади - 7/5, 6/3.

Америкалик теннисчи ўзаро учрашувларда иккинчи бор Рибакинани таслим этди - 2:3. Лекин умумий устунлик ҳамон Елена томонида. Коллинз 4, Рибакина 5 та эйс зарбасини ижро этди. Қўшхатолар бўйича мутлақ устунлик Даниэль томонида - 3 га 0. Брейклардан фойдаланиш бўйича ҳам айнан у етакчи бўлди - 3 га 1. 

Эътиборлиси, Коллинз фаолиятида илк бор WTA 1000 тоифасига кирувчи турнир чемпиони бўлди. Miami Open турниридаги муваффақиятли иштирок унга 1000 рейтинг очкоси ҳамда 1 миллион 100 минг АҚШ доллари миқдоридаги мукофот пулини келтирди. Эртага эълон қилинадиган ҳафталик янги WTA рейтингида у дунёнинг 22-ракеткасига айланади. Январь ойида 30 ёшли Даниэль ўзининг катта теннисдаги сўнгги мавсумини ўтказишини айтганди.