Мўминжон Абдуллаев Токио Олимпиадасига боради!

Қувонарлиси, бироз аввал юнон-рум курашчимиз Мўминжон Абдуллаев ярим финал учрашувида хитойлик Линг Же Менга қарши гиламга чиқди ва рақибини 9-0 ҳисобида доғда қолдирди. Ушбу ғалаба Абдуллаевга Токио Олимпиадаси йўлланмасини тақдим этди. 

Маълумот учун, 130 кг вазндаги юнон-рум курашчимиз илк беллашувда ҳиндистонлик Навин Навиндан 9-0, кейин қирғизистонлик Роман Кимдан 4-0, учинчи баҳсида япониялик Арата Сонодадан 9-0 ҳисобида устун келган эди. 

Афсуски, 67 кг вазн тоифасида юртимиз шарафини ҳимоя қилган жаҳон чемпионатининг кумуш медали совриндори Арам Варданян 1/2 финалда кореялик икки карра жаҳон чемпиони Хансу Рюга ютқазиб қўйди. Рю ўз-ўзидан Олимпиада йўлланмасини қўлга киритди. 

Яна бир курашчимиз, 97 кг вазн тоифасидаги беллашувларда иштирок этган Жаҳонгир Турдиев 1/4 финалда эронлик Муҳаммадҳади Саравига имкониятни бой берди. Энди 67 ва 97 кг вазн тоифаларидаги курашчиларимиз келаси ой Болгарияда ўтказиладиган сўнгги - жаҳон лицензион турнирида охирги имкониятдан фойдаланадилар.