Нганну UFC'га қарши чиққан Жейк Полни қўллаб-қувватлади

Фрэнсис Нганну UFC'ни бир неча бор ўз жангчиларига, хусусан, тиббий ёрдам учун тўловларга эътибор бермасликда айблаган Жейк Полни қўллаб-қувватлади.

"Унинг жангчилар саломатлигига қайғуриш ҳақидаги гапларига 100 фоиз қўшиламан. Жангчиларга тўловларни ошириш тўғрисидаги гапларига эса 1000 фоиз. Жангчилар ҳимояланмаган. Улар ўз ҳолича қолди, улар билан ҳеч ким қизиқмайди.

Баъзида сиз спорт залида ҳозиргина мағлубиятга учраган, кейин машғулотга кирган ва яна жароҳат олган спортчини кўрасиз. Бундайлар тузалиб кетишига фақатгина умид қилиши мумкин, чунки унинг даволанишга қурби етмайди. 

У ташкилотдан топаётган пулига тирикчилик қилишини яхши билади. Унда шартнома бор ва ҳаммаси яхши. Унинг қийналаётганини кўриб бу нормал ҳолат деб ўйламанг. Бу нормал ҳолат эмас. Йигитлар ўз соғлиғини хавф остига қўядилар. Шунинг учун ҳеч бўлмаганда уларнинг саломатлигига ғамхўрлик қилинг", - деди Фрэнсис.