Нигина Абдураимова Свитолина қатнашаётган турнирдаги иштирокини ғалаба билан бошлади

Хабар берганимиздек, ушбу мусобақада ҳамюртимиз Нигина Абдураимова ҳам иштирок этяпти. Мамлакатимизнинг биринчи ракеткаси турнирнинг илк даврасида германиялик Мона Бартелга қарши баҳс олиб борди. Етмиш олти дақиқа давом этган учрашувда ҳамюртимиз 6/3, 6/4 ҳисобида зафар қучди. 

Таққослаш учун, Абдураимова WTA рейтингида 186, Бартел эса 201-ўринни эгаллаб турибди. Теннисчиларнинг ўзаро учрашувида Абдураимова ҳисобни тенглаштирди - 1:1. Турнирда саккизинчи рақам остида таснифланган теннисчимизнинг иккинчи даврадаги рақибаси бугун ўтказиладиган Алисе Тубелло (Франция) - Дарья Семенистая (Латвия) учрашувидан сўнг аниқланади. 

Дарвоқе, Швейцариядаги ушбу турнирда деярли икки йиллик танаффусдан сўнг катта теннисга қайтган украиналик Элина Свитолина ҳам иштирок этяпти. Ташкилотчилар WTA рейтингида 1344-поғонада бораётган Свитолинага асосий тўрда тўғридан-тўғри қатнашиш ҳуқуқини берувчи вайлд-кард, яъни имтиёзли йўлланма тақдим этишган. Элина бугун биринчи даврада дунёнинг 160-ракеткаси, руминиялик Елена Габриэла Рьюсга қарши кортга чиқади.