Нурсултонни хафа қилган UFC жангчиси Шавкат Раҳмоновга "вызов" ташлади

UFC ярим ўрта дивизионининг еттинчи рақамли жангчиси Хоакин Бакли Шавкат "Номад" Раҳмоновга қарши октагонга чиқиш истагини билдирди.

"Шавкат Раҳмонов, февраль ойи бошида қайтмоқчиман дедингми? Ундай бўлса, Бокуга кел. Чунки сен доим: "Бак - осон иш. У оддий ўлжа" дер эдинг. Ўзингни бутун дунёга кўрсат, чунки сени анчадан бери ҳеч ким кўргани йўқ, ука. Биз сени кутамиз. Бу мен ва Шавкат учун ажойиб жанг бўлади деб ўйлайман. Шавкатни нокаутга учратганимдан кейин эса чемпионлик жанги ҳақида қайғураман", - деди Бакли YouTube’даги каналида эълон қилинган видеода.

Маълумот учун, Шавкат Раҳмонов сўнгги жангини ўтган йилнинг декабрь ойида ўтказиб, даъвогарлар баҳсида Ян Мачадо Гаррини ҳакамларнинг якдил қарори билан мағлубиятга учратганди. Аммо кейин тиззасидаги жароҳат сабаб чемпионлик жангидан маҳрум бўлган. Шавкатнинг имкониятидан Жек Делла Маддалена фойдаланиб кетганди. Қозоғистонлик жангчининг менежери Саят Абдрахманов яқинда берган интервьюсида унинг шогирди январь ойининг охири ёки февраль ойининг бошида қайтишни режалаштираётгани ва дивизионнинг энг яхшиларидан бири билан даъвогарлик жангини ўтказишга тайёрлигини маълум қилганди.

Хоакин Бакли эса июнь ойида олтита ғалабадан иборат сериясини тўхтатиб, беш раунд якунига кўра ҳакамларнинг якдил қарори билан Камару Усманга ютқазган эди.