Олимпия шон-шуҳрати музейи замонавий қиёфа касб этади, гимнастикачилар мажмуаси ҳам таъмирланади

Жисмоний тарбия ва спорт вазирининг биринчи ўринбосари Равшан Эрматов, вазир ўринбосари Нодир Муротов, Миллий Олимпия қўмитаси раиси Рустам Шоабдураҳмонов ҳамда Ўзбекистон спорт фахрийлари кенгаши раиси Баҳодир Махситов Тошкент шаҳридаги Олимпия шон-шуҳрати музейи ҳамда Ўзбекистон Гимнастика федерацияси фаолияти билан яқиндан танишди.

Дастлаб мутасаддилар Олимпия шон-шуҳрати музейини бориб кўришди. Бу ерда ҳозирги пайтда рконструкция ишлари олиб борилмоқда. Мазкур музей дунёдахудди шундай бешта музейнинг биридир. Музей 1996 йилда барпо этилган. Шундан бери ўз кўринишини асл ҳолича сақлаб қолган ушбу даргоҳни янгича услубда таъмирлаш бўйича топшириқ берилган.

"Чорак асрдан бери фаолият олиб бораётган Олимпия шон-шуҳрати музейини замонавий кўринишга келтириш, жаҳон стандартларига мос равишда, сифатли қилиб таъмирлашимиз лозим. Негаки бу музейда ўзбек спортининг шонли ғалабалари акс этган. Жисмоний тарбия ва спорт вазирлиги ҳамда Миллий олимпия қўмитаси бу борада музейга амалий кўмак беришга келишиб олди”, - деди Равшан Эрматов.

Ўрганиш давомида музей раҳбариятига таъмирлаш жараёнида нималарга аҳамият қаратиш кераклиги борасида кўрсатма ва тавсиялар берилди.

Шундан сўнг, мутасаддилар пойтахтимизнинг Юнусобод туманида жойлашган Ўзбекистон Гимнастика федерациясини ҳам бориб кўришди. Федерацияга қарашли спорт саройи пандемия сабабли беморлар учун даволаш масканига айлантирилган эди. Ҳозир бу ерда тозалов ва дезинфекция ишлари амалга оширилиб, аллақачон спортчилар машғулотларга киришган. Спорт мажмуаси билан танишиш давомида машғулот олиб бораётган спортчилар билан ҳам суҳбат ўтказилди. Уларга яратиб берилган шарт-шароитлар ўрганилди ва спортчи қизларга омад тиланди.

Шунингдек, спорт мажмуани қайта таъмирлаш бўйича келишиб олинди ва мутасаддиларга тегишли топшириқлар берилди.