Осака "Ролан Гаррос"дан кейин ҳам рейтинг пешқадами бўлиб қолади

Бунга рейтингнинг иккинчи поғонасидан жой олиб турган чехиялик Каролина Плишкованинг мағлубияти сабаб бўлди. Каролина бундан бир неча дақиқа аввал "Ролан Гаррос"нинг учинчи даврасида хорватиялик Петра Мартичга ютқазиб қўйди - 3:6, 3:6.

Шу тариқа, Плишкова рейтинг пешқадами бўлиб олиш имкониятини қўлдан чиқарди. Наоми Осака эса турнирда қандай натижа қайд этилишидан қатъий назар камида яна бир ҳафтага ўз ўрнини сақлаб қолади.  

"Ролан Гаррос" стартига қадар Петра Квитова, Кики Бертенс ва Анжелик Керберда биринчи ўринга кўтарилиб олиш имконияти бор эди. Уччала теннисчи ҳам мағлубиятга учраб, мухлислар қаторидан жой олди. Агар Эшли Барти ярим финалга чиқса, Элина Свитолина турнирни ютса, иккинчи ўриндаги Плишковадан ўзиб кетади.