От спортининг "поло" тури бўйича мусобақа ўтказилди + ФОТО

Мусобақада  Тошкент шаҳри, Тошкент, Сирдарё ва Жиззах вилоятлари чавандозлар мактаблари чавандозлари иштирок этиб, ўзаро беллашди.

– Биламизки, азал-азалдан юртимизда отга инсоннинг содиқ ҳамроҳи сифатида қаралган. Тўйу тадбирлар эса кўпкарисиз, от спортининг бошқа турларисиз ўтмаган, – дейди Сирдарё вилояти Чавандозлар мактаби директори Ёқубжон Жалилов. — Давлатимиз раҳбарининг 2021 йил 11 мартдаги "Йилқичилик ва от спортини янада ривожлантириш ҳамда замонавий бешкураш ва поло спорт турини оммалаштириш бўйича қўшимча чора-тадбирлар тўғрисида"ги қарори эса  юртимизнинг барча ҳудудларида бўлгани каби Сирдарёда ҳам йилқичиликни ривожлантириш, от спортининг бешкураш ва поло спорт турини янада жадал давом эттиришга ҳуқуқий замин яратди. 

Президентимизнинг мазкур қарори сабаб ёшларни от спортига кенг жалб этиш, уларнинг бўш вақтларини мазмунли ўтказиш, келажакда Ўзбекистон шарафини муносиб ҳимоя қила оладиган чавандоз ва спортчиларни тайёрлаш мақсадида Сирдарё вилояти Чавандозлар мактаби учун 2023 йилда умумий қиймати 2 млрд сўм бўлган иншоот, спорт отларини мусобақаларга олиб бориш учун “Исузу” русумли махсус жиҳозланган автомашина харид қилиниб, бугунги кунда ундан фойдаланиб келинмоқда.

Сирдарёда ўтказилган "поло" мусобақасида Тошкент шаҳрининг Чавандозлар мактабидан ташриф буюрган чавандозлар ўзларнинг "Пантера", "Чемпион", "Шамол", "Лазер" лақабли отлари билан биринчиликни қўлга киритди. Иккинчи ўринга Тошкент вилояти Чавандозлар мактаби, учинчи ўринга Сирдарё вилояти Чавандозлар мактаби вакиллари сазовор бўлди.

Мусобақа якунида ғолиб ва иштирокчиларга ташкилотчиларнинг фахрий ёрлиқ ва қимматбаҳо совғалари топширилди. Сирдарё вилояти ҳокимлиги томонидан  спорт отлари ва спортчиларга қулай шарт-шароит яратиш мақсадида Сирдарё вилояти Чавандозлар мактабига берилган 550 млн сўмлик “ISUZU” D.MAX русумли пикап автомобили ва спорт отларини ташиш учун махсус жиҳозланган тиркама эса кутилмаган туҳфа бўлди.