Пакьяо Мейвезер билан реванш жанги музокаралари ўтказилаётганини тасдиқлади

Филиппинлик бокс афсонаси бу хабарлар асосга эга экани, музокалар ҳам бошланганини маълум қилди. Реванш мақомидаги жанг 2026 йилда бўлиб ўтиши мумкин. Пакьяо шу йилнинг ёзида профессионал рингга қайтган ва ярим ўрта вазн тоифасида WBC чемпиони Марио Барриосга қарши 12 раундлик жангда дуранг натижа қайд этганди. Мейвезер эса 2017 йилдан бери профессионал рингга чиқмаган.

Яқинда Netflix стриминг хизмати Мейвезер ва Пакьяо ўртасидаги реванш жанги трансляциясига қизиқиш билдиргани ва у апрель ойида Лас-Вегасда кўргазмали эмас, балки тўлақонли профессионал жанг сифатида ўтказилиши ҳақида хабарлар тарқалди.

"Флойд қайтса бўлди, бу амалга ошади, мен аллақачон қайтдим, - деди Пакьяо The Sun нашрига берган интервьюсида. - Музокаралар бўляпти. Флойд билан эҳтимолий реванш муҳокамасини бошлашдан хурсандман. Албатта, реванш олиш учун яхши имконият бор, чунки мен жангларни давом эттиряпман, аммо бу фақат Флойд қайтиб келган тақдирдагина амалга ошади". 

Маълумот учун, Пакьяо ва Мейвезер ўртасидаги биринчи жанг 2015 йилда бир неча йиллик музокаралардан сўнг бўлиб ўтган ва унда Мейвезер ғалаба қозонганди. 

"Мен ўша пайтдаёқ реванш олишни хоҳлаганман. Операциядан кейин рингга қайтишга тайёр эдим. Ҳозир боксдаги фаолиятимни давом эттиришим учун Худо менга куч ва яхши соғлиқ бермоқда. Мен жангчиман ва ҳеч кимдан қочмайман. Мен ҳар қандай рақиб билан тўқнаш келишим мумкин", - деди Мэнни.