Пара-атлетларимиз Гран-прини жаҳон рекорди билан бошлашди

Мусобақанинг биринчи кун доирасида бир қатор йўналишларда ғолиб ва совриндорлар аниқлаб олинди.

Аҳамиятлиси, ушбу кун беллашувларини ҳамюртларимиз муваффақиятли ўтказиб олишди. Айниқса, ўз тоифаларида баҳс олиб борган ядро улоқтирувчиларимиз юқори натижалар қайд этишди. Бу борада F40/41 тоифаларида кечган курашни алоҳида таъкидлаб ўтиш мумкин. 2019 йил жаҳон чемпионати орқали Токио-2020 Паралимпиадасига йўлланма олган вакилимиз Бобур Омонов мусобақага юқори спорт формасида ташриф буюрганини амалда исботлаб, олтин медаль қатори жаҳон рекордини янгилашга муваффақ бўлди. Ушбу йўналишда иштирок этган бошқа бир вакилимиз Мансур Ғоибназаров эса кумуш медаль билан тақдирланди.

Шунингдек, яна бир Олимпиада лицензиатимиз Элбек Султонов ядро улоқтиришнинг (F12 тоифасида) олтин, узунликка сакрашда Сабина Суханова (Т37/38 тоифаларида) бронза медалига сазовор бўлишди. Бу билан барча совриндор ҳамюртларимиз жаҳон ва Олимпиада рейтинги учун қимматли очколарини ўз ҳисобига ёзиб қўйишди.