Президент Қарори – Осиё ва Париж Олимпия ўйинларига тайёргарлик учун дастурил амал

Куни кеча Ўзбекистон велосипед спорти федерациясининг тақдимоти тингланди.

Тадбирда МОҚ раиси Рустам Шоабдураҳмонов, Туризм ва спорт вазирининг ўринбосари Аваз Каримов, Қўмита раиси ўринбосари Шерзод Ташматов, Ўзбекистон спорт фахрийлари кенгаши раиси Баҳодир Махситов, Козим Ўринбойхўжаев бошчилигидаги Ўзбекистон велосипед спорти федерацияси мутасаддилари, Спортнинг қишки ва мураккаб турлари бўйича Республика Олий спорт маҳорати мактаби вакиллари қатнашдилар.

Даставвал велоспортчиларимизнинг Токио-2020 Олимпиадасидаги иштироки, тайёргарлик даври, спорт оммавийлиги муҳокама қилинди. Қайд этиш жоиз, 2019 йил Тошкентда ўтган велошоссе бўйича Осиё чемпионати ушбу спорт оммавийлиги йўлида катта туртки бўлди. У орқали делегациямиз Олимпия ўйинларига 2 та лицензия олиш баробарида, қатор медалларни ҳам қўлга киритди.

Оммавийликнинг ортиши ва бошқа ютуқлар қатори мавжуд муаммолар ҳам муҳокама марказида бўлди. Унда баъзи вилоятларда бўлимларнинг очилмагани, айримларида моддий техник база талаб даражасида эмаслиги таъкидланиб, уларни бартараф этиш бўйича таклифлар кўриб чиқилди.

Қайд этиш жоиз, куни кеча ушбу спорт турини ривожлантириш бўйича Ўзбекистон Республикаси Президентининг Қарори эълон қилинди. Ушбу ҳужжатда мамлакатимизда велосипед спорт турини оммалаштириш, унинг ривожини янги босқичга олиб чиқиш, профессионал клублар ташкил этиш, юртимизда кўплаб халқаро турнирлар ўтказиш ва бошқа кўплаб керакли йўналишлар кўрсатиб ўтилган. Тақдимотда ҳам федерация мутасаддилари Ханчжоу ва Париж мусобақаларига тайёрланишда ушбу Қарорда кўрсатиб ўтилган йўналиш билан иш олиб борилишини алоҳида таъкидладилар.