Рамешбабу чемпион бўлган Superbet Chess Classic Romania турнирида Абдусатторов нечанчи ўринни эгаллади?

Grand Chess Tour 2025 таснифига кирувчи — Superbet Chess Classic Romania турнирининг мукофот жамғармаси 350 000 АҚШ долларини ташкил қилди. Дунёнинг кўзга кўринган гроссмейстерлари қаторида бош соврин учун ҳамюртимиз Нодирбек Абдусатторов ҳам кураш олиб борди. 

Гроссмейстеримиз кеча ўтказилган сўнгги 9-тур учрашувида америкалик Уэсли Сога қарши оқ доналарда ўйнади ва дуранг натижа қайд этди. Бу билан Нодирбек 9 имкониятдан 4,5 очко жамғариб, мусобақани кучли бешликда якунлади. Абдусатторов 10 нафар иштирокчи орасида рейтинг бўйича 7-рақам остида таснифланган эди. 

Мусобақа чемпионлиги Рамешбабу Праггнанандҳага насиб этди. Ҳиндистонлик гроссмейстер турнирда олтинчи рақам остида ўйнади ва сўнгги 9-турда америкалик Левон Аронян билан муросага келди. Беш ярим очко жамғарган Рамешбабу қўшимча кўрсаткичларга кўра мусобақа чемпиони бўлди. 

Франциялик Алиреза Фирузджа қора доналарда ҳаракат қилганига қарамай, руминиялик Богдан-Даниэл Дикни мағлубиятга учратди. Яна бир француз шахматчиси Максим Вашье-Лаграв польшалик халқаро гроссмейстер Ян-Криштоф Дудадан устун келди. Ҳиндистонлик Доммараджу Гукеш ҳамда америкалик Фабиано Каруана партиясида томонлар муросага келишди. 

Маълумот учун, Нодирбек Абдусатторов 1 ғалаба, 7 дуранг ва 1 мағлубият билан турнир якунида 4,5 очко жамғарди. Ҳамюртимиз мусобақадаги ягона мағлубиятини айнан Рамешбабудан қабул қилиб олди.