Саккари стартдаёқ 96-ракеткага ютқазиб қўйди

Дунёнинг тўққизинчи ракеткаси Мария Саккари кутилмаганда илк даврадаёқ WTA рейтингида 96-поғонада бораётган германиялик Юле Нимайерга 6/2, 2/6, 6/7(4) ҳисобида имкониятни бой бериб қўйди. Бу теннисчиларнинг ўзаро ўтказган илк учрашуви бўлди. 

Икки соату 36 дақиқа давом этган баҳсдаги барча статистика иккала теннисчида ҳам бир хил кўринишда бўлди. Саккари ҳам, Нимайер ҳам 6 тадан эйс зарбасини амалга оширган. Иккала теннисчи ҳам 4 тадан қўшхатога йўл қўйиб, 4 тадан Брейкка эришди. 

Таъкидлаш жоиз, Мария Саккари мураббийи Дэвид Уитт билан хайрлашганидан кейин кетма-кет тўртинчи учрашувида ҳам мағлубиятга учради. Нимайер эса асосий тўрга лаки-лузер сифатида қўшилганди. У Элизабетта Коччиареттонинг ўрнини эгаллаганди. Энди у Bad Homburg Open турнири иккинчи босқичида испаниялик Паула Бадосага қарши кортга чиқади.