Самарқанд паҳлавони - Икром Шарипов!

Бу галги қаҳрамонимиз армрестлинг бўйича терма жамоамиз аъзоси, кўплаб халқаро мусобақалар ғолиб ва совриндори Икром Шарипов бўлади. 

Икром Шарипов - 2005 йилдан армрестлинг бўйича Ўзбекистон миллий терма жамоа аъзоси, кўпкара Республика чемпионати ғолиби, халқаро тоифадаги спорт устаси. Унинг фидокорона меҳнати ва жисмоний маҳорати сабаб жаҳон ареналарида юксак натижаларга эришган. Икки карра жаҳон чемпионати ғолиби Юсуп Кадиров раҳбарлигида вилоят, Республика ва халқаро миқёсдаги мусобақаларда муваффақиятли иштирок этиб, Ватанимиз шарафини муносиб ҳимоя қилди.  

2016 йилнинг 26-30 апрель кунлари Тошкент шаҳрида ўтказилган Осиё чемпионатида иштирок этиб, олтин медаль сохиби бўлди. 2021 йил 17-21 август кунлари Қозоғистоннинг Алмати шаҳрида ташкил этилган Осиё чемпионатида 90 кг вазн тоифасида икки карра Осиё чемпионига айланиб, миллий терма жамоамизнинг юқори ўринларни эгаллашига ҳиссасини қўшди.

2023 йили Самарқанд шаҳрида ўтказилган Осиё кубоги ғолибига айланди. Шунингдек, Икром Шарипов бир қатор нуфузли халқаро мусобақаларда юртимиз шарафини муносиб ҳимоя қилиб, муваффиятларга эришди.

2022 йил 26-27 февраль кунлари Чехия давлатида ўтказилган GOLEMS HAND халқаро турнирида бронза медали совриндори, 2023 йил 20-21 март кунлари Япониянинг Токио шаҳрида ўтган U.A.G TOKYO OPEN ананавий халқаро турнирда бронза ҳамда 2023 йил 26-27 май кунлари Янги Зеландиянинг Окленд шаҳри мезбонлик қилган нуфузли IRON HAND NEW ZEALAND OPEN халқаро турнири олтин медалига сазовор бўлган.

Икром Шарипов етакчи спортчи бўлишига қарамасдан, Ўзбекистон армрестлинг федерациясининг Самарқанд филиали бўлимида мураббий лавозимида ишлаяпти. Спорт клуб гуруҳи асосан Жисмоний имконияти чекланган спортчилар ташкил қилинган бўлиб, пара-армрестлинг миллий терма жамоасига етакчи спортчиларни тайёрлашда ўз хиссасини қўшди.  

Шу давр ичида унинг шогирдларидан Қудрат Тошбоев шу йилнинг 24 августидан 3 сентябрига қадар Қозоғистоннинг Алмати шаҳрида ўтказилган пара-армрестлинг (Жисмоний имонияти чекланган спортчилар) бўйича жаҳон чемпионатида муваффақиятли иштирок этиб, кумуш медални қўлга киритди.  

Икром Шариповнинг спортда эришган ютуқлари учун Самарқанд вилояти ҳокимлиги, Ўзбекистон армрестлинг федерацияси, Осиё армрестлинг федерацияси ҳамда халқаро армрестлинг федерациясининг фахрий ёрлиқлари билан тақдирланган.