Сергей Фомин Актобе турнирининг биринчи ракеткасини мағлуб этди

Мукофот жамғармаси 15 000 долларни ташкил этувчи ушбу мусобақада ҳамюртимиз Сергей Фомин ҳам муваффақиятли қатнашяпти. Мамлакатимизнинг иккинчи ракеткаси 1/2 финал иштирокчисига айланди. 

Фомин бироз аввал якунига етган 1/4 финал баҳсида мусобақанинг биринчи ракеткаси, россиялик Евгений Филипповни 7/6(1), 6/3 ҳисобида мағлубиятга учратди. Бир соату 29 дақиқа давом этган учрашувда Фомин 4, Филиппов 9 та эйс зарбасини амалга оширган. 

Таққослаш учун, турнирда саккизинчи рақам остида таснифланган Фомин ATP рейтингида 674, Евгений Филиппов эса 542-ўринни эгаллаб турибди. Энди ҳамюртимиз финал чиптаси учун яна бир рус теннисчиси Егор Агафоновга қарши кортга чиқади. 

Дунёнинг 582-ракеткаси бўлиб турган Агафонов бугун 1/4 финалда рейтингнинг 1285-поғонасида бораётган қозоғистонлик Арсланбек Айткуловни қийинчилик билан мағлубиятга учратди - 6/3, 7/6(5).