Сергей Фомин Актобе турнирининг финал остонасида тўхтатилди

Мукофот жамғармаси 15 000 АҚШ долларини ташкил этувчи ушбу мусобақада ҳамюртимиз Сергей Фомин ҳам ўз имкониятини синаб кўрди. Мамлакатимизнинг иккинчи ракеткаси 1/4 финалда мусобақанинг биринчи ракеткаси, россиялик Евгений Филипповни 7/6(1), 6/3 ҳисобида мағлубиятга учратганди. 

Афсуски, у бироз аввал якунига етган 1/2 финал учрашувида турнирнинг тўртинчи ракеткаси, россиялик Егор Агафоновга 1/6, 4/6 ҳисобида ютқазиб, мусобақадаги иштирокини якунлади. Олтмиш саккиз дақиқа давом этган баҳсда Фомин 5, Агафонов 3 та эйс зарбасини амалга оширган. Иккала теннисчи ҳам биттадан қўшхатога йўл қўйди.  

Таққослаш учун, турнирда саккизинчи рақам остида таснифланган Фомин ATP рейтингида 674, Егор Агафонов эса 582-ўринни эгаллаб турибди.