01 май 14:10
Янгиликлар

Теннис

Сергей Фомин иштирокидаги баҳс 11 дақиқа давом этди

Қозоғистоннинг Шимкент шаҳрида ўтказилаётган теннис турнирида чорак финалчилар аниқланмоқда.

М15 тоифасига кирувчи ушбу мусобақада ҳамюртимиз Сергей Фомин ҳам муваффақиятли одимлаяпти. Турнирда биринчи рақам остида таснифланган вакилимиз бироз аввал 1/8 финал баҳсида ҳиндистонлик Кумаран Бҳаратга қарши кортга чиқди. Биринчи сетнинг учинчи геймидан кейин ҳинд теннисчиси баҳсни давом эттира олмаслигини маълум қилди.

Шу тариқа, ATP рейтингида 461-ўринни эгаллаб турган Сергей Фомин кейинги босқичга йўл олди. Унинг чорак финалдаги рақиби россиялик теннисчилар - Александр Чайка ёки Бекхан Атлангериев бўлади.