Сергей Фомин Shenzhen 4 турнирида муваффақиятли старт олди

Challenger 75 тоифасига кирувчи турнирнинг мукофот жамғармаси 100 000 АҚШ долларини ташкил қилади. Саралаш баҳсларида ҳамююртимиз Сергей Фомин ҳам ўз маҳоратини намойиш этмоқда. У саралашда бешинчи рақам остида таснифланган. 

Мамлакатимизнинг иккинчи ракеткаси илк даврада таиландлик Вишая Тронгчароенчайкулга қарши кортга чиқди. Етмиш олти дақиқа давом этган учрашувда Фомин рақибини икки сетда ҳам бир хил ҳисобда мағлубиятга учратди - 6/3, 6/3. Сергей баҳс давомида 4, Вишая эса 9 та эйс зарбасини амалга оширган. 

Таққослаш учун, Фомин ATP рейтингида 492, Тронгчароенчайкул эса 826-поғонани банд этган. Эртага теннисчимиз саралашнинг 1/2 финалида америкалик Эван Чжуга қарши кортга чиқади.