Сергей Ковалёв Де Ла Хояни судга берди

Маълумотларига кўра, россиялик собиқ жаҳон чемпиони Сергей Ковалёв (34-4-1, 29 КО) таниқли промоутер Оскар Де Ла Хойянинг Golden Boy Promotions компаниясини судга берди.

2019 йилнинг ноябрь ойида Ковалёв Сауль Альваресга нокаут эвазига ютқазиб, WBO чемпионлик камарини бой берганди. Шартнома шартларига кўра, Альвареснинг собиқ промоутери Golden Boy россиялик учун навбатдаги жангни ўтказиши ва фахрийнинг кафолатланган бадал пули - 2,5 миллион АҚШ долларини тўлаб бериши керак эди.  

Ковалёвнинг 2020 йилнинг апрель ойида кубалик Салливан Баррера билан жанг ўтказиши тахмин қилинганди, аммо коронавирус пандемияси туфайли жанг бекор қилинди. Коволёвга 2021 йилнинг январида ҳамюртимиз Бектемир Мелиқўзиев билан жанг ўтказиш таклиф қилинди, аммо Сергей допинг-тестдан ўта олмаганлиги туфайли бу жанг ҳам амалга ошмади.

Golden Boy компанияси ушбу воқеа шартномани бекор қилиш учун етарли сабаб дея қарорга келди. Лекин боксчи ва унинг промоутери Кети Дува бошқача фикрда - улар судда ўзларини ҳимоя қилишга ҳаракат қиляптилар.