Шамсиддин Воҳидов ва Афруза Ҳамдамова Осиё чемпионати пешқадамлари сафида

Мукофот жамғармаси 80 000 АҚШ долларини ташкил этувчи мазкур мусобақада Ўзбекистон терма жамоаси ҳам катта таркибда қатнашяпти. Қитъа чемпионатининг эркаклар ўртасидаги баҳсларида 33 мамлакатдан 156, аёлларда эса 23 давлатдан 101 нафар иштирокчи медаллар учун дона сурмоқда. 

Эътиборлиси, бунгача Европа қитъаси мусобақаларида қатнашган ва бир муддат турнирлардан четлатилган Россия терма жамоаси шахматчилари ҳам мазкур Осиё чемпионатида медаллар учун кураш олиб боришяпти. 

Осиё чемпионатининг 3-турида ҳамюртларимиз орасида энг яхши кўрсаткичга эга бўлиб турган гроссмейстеримиз Шамсиддин Воҳидов (2641) қора доналарда россиялик гроссмейстер Алексей Гребнёв (2556) билан дуранг ўйнади. Ҳар икки шахматчининг очколари 2,5 тага етди. Уларнинг ҳар иккиси ҳам дастлабки икки турда ғалаба қозонишган эди. 

Осиё чемпионатида қатнашаётган биринчи рақамли шахматчимиз Нодирбек Якуббоев (2665) 3-турда қора доналарда ҳаракат қилиб, қозоғистонлик Аристанбек Уразаев билан муросага келди. Якуббоевнинг очколари 2 тага етди. Иккита учрашувда ғалаба қозонган Муҳиддин Мадаминов (2520) бу сафар қора доналарда эронлик гроссмейстер Бардия Данешвар (2621)га имкониятни бой бериб қўйди. 

Учинчи турда ҳамюртларимиздан Муҳаммадзоҳид Суяров (2491), Ҳумоюн Бегмуротов (2461), Баҳром Баҳриллаев (2407) рақиблари билан муросага келишди. Асроржон Омонов(2387) қозоғистонлик тажрибали гроссмейстер Ринат Жумабоевга, Афрузбек Собиров эронлик таниқли гроссмейстер Амин Табатайига имкониятни бой берди.

Учинчи турдан сўнг Бардия Данешвар юз фоизлик натижа билан турнир жадвалида якка пешқадам бўлиб турибди. Айни дақиқаларда ўтказилаётган 4-турнинг биринчи доскасида Шамсиддин Воҳидов айнан Бардияга қарши баҳс олиб бормоқда. Агар ҳамюртимиз ушбу учрашувда ғалаба қозонса, карвонбошига айланиб олади.  

Аёллар ўртасидаги мусобақада ёшлар ўртасида икки карра жаҳон чемпиони Афруза Ҳамдамова уччала турда ҳам ғалабага эришиб, пешқадамлар сафида бормоқда. У 3-турда оқ доналарда ўйнаб, эронлик рақибаси Мелика Моҳаммадидан устун келди. Умида Омонова россиялик Олимпиада чемпиони Ольга Гиряга имкониятни бой берди. 

Бир муддат АҚШ шарафини ҳимоя қилган Гулруҳбегим Тоҳиржонова Ўзбекистон терма жамоаси учун қайтганидан кейинги илк мусобақасида қатнашяпти. У 3-турда мўғулистонлик Ууртсайх Ууринтуяни мағлубиятга учратди. Тоҳиржонова дастлабки икки учрашувида дуранг натижа қайд этганди. Нодиржонова Нодира (WIM, 2130) ўзига хос ўзбек дербисида Зилола Актамовани таслим этди. 

Бу турда ҳамюртларимиздан Барчиной Шокиржонова, Гулдона Каримова, Моҳим Ўрозмуҳаммедова, Руқия Олимова зафар қучишди. Нилуфар Имомқўзиева мўғулистонлик рақибаси билан дуранг ўйнади. Маржона Маликова, Асал Салимова, Мадинабону Халилова, Одина Олимова ва Лилия Белая рақибаларига ютқазиб қўйишди.