Шлеменко - Минеев бирлаштирувчи чемпионлик жанги ўтказилиши мумкин

Россиянинг бугунги кун яккакураш юлдузлари - Александр Шлеменко ҳамда Владимир Минеевнинг ўзаро октагонда рўбарў келиши кутилмоқда. Бунинг учун биринчи галда Шлеменко ўрта вазнда Eagle FC камарини қўлга киритиши лозим. Куни кеча Магомед Исмаиловни нокаутга учратган Владимир Минеев эса AMC Fight Nights камари соҳиби бўлиб турибди.

Ташкилотчилар AMC Fight Nights ва Хабиб Нурмагомедовга тегишли Eagle FC лигалари чемпионлари ўртасида бирлаштирувчи чемпионлик жангларини ўтказиш бўйича музокарага киришишган. Бу ерда кўп нарса айнан Хабибга боғлиқ бўлади. 

Эслатиб ўтамиз, Александр Шлеменко шанба оқшомида ватандоши Артур Гусейновни очколар ҳисобига кўра мағлубиятга учратган эди. Шу жангдан сўнг лига раҳбари Хабиб Нурмагомедов собиқ Bellator чемпиони ҳисобланган Шлеменкони ўрта вазн Eagle FC камарига расмий даъвогар деб эълон қилганди. Айни пайтда ушбу камар тожикистонлик Фаридун Одиловнинг қўлида бўлиб турибди. Одилов - Шлеменко жанги март ойида ўтказилади.