Синдаров қатнашаётган Grand Chess Tour: Sinquefield Cup 2026 турнирида 5-тур ортда қолди

Дунёнинг кўзга кўринган гроссмейстерлари иштирок этаётган турнир классик шахмат йўналишида 9 турдан иборат айланма тизимида ўтказиляпти. Бешинчи турда Жавоҳир Синдаров америкалик Сэм Севианга қарши оқ доналарда ўйнаб, дуранг натижа қайд этди. 

Бу турда иккита ғалаба қайд этилди. Америкалик Фабиано Каруана ҳамюрти Левон Аронянни, германиялик Винсент Кеймер нидерландиялик Аниш Гирини оқ доналарда мағлубиятга учратди. Қолган партиялар дуранг натижа билан якунланди. 

Бешинчи турдан сўнг Уэсли Со 5 имкониятдан 3,5 очко жамғариб, якка пешқадамлик қиляпти. Тўрт нафар иштирокчи - Фабиано Каруана, Винсент Кеймер, Рамешбабу Праггнанандҳа, Максим Вашье-Лаграв 3 очкодан жамғариб, Топ-5`таликдан жой олган. Левон Аронян ва Сэм Севиан ҳисобида 2,5 очкодан бор. Жавоҳир Синдаров 2 очко билан 8-поғонада бормоқда. Аниш Гири 1,5 очко билан 9, 1 очкога эга Йорден ван Форест эса сўнгги 10-ўриндан жой олган.

Бугун турнирда дам олиш куни сифатида эълон қилинган. Эртага ўтказиладиган 6-турда Жавоҳир Синдаров қора доналарда Фабиано Каруанага қарши баҳс олиб боради. Эртанги учрашувлар ҳам бизнинг вақт билан соат 22:00да бошланади. 

Тўлиқ иштирокчилар таркиби: Жавоҳир Синдаров (Ўзбекистон), Фабиано Каруана (АҚШ), Прагнанандҳаа Рамешбабу (Ҳиндистон), Уэсли Со (АҚШ), Левон Аронян (АҚШ), Аниш Гири (Нидерландия), Винсент Кеймер (Германия), Максим Вашье-Лаграв (Франция), Йорден ван Форест (Нидерландия), Сэм Севьян (АҚШ).